No har eg
tenkt på å skriva til deg lenge, men eg har berre ikkje fingje ut fingjen. Men
her kjem ei lita soge om korleis eg opplevde to veker i godt lag på Elze 19. april til 3. mai.
Det byrja tidleg om morgonen påskeaftan 19. april på Sola
Flyhamn. Meg og Lars Martin sat og venta på å få borda flogemaskinen. På
Flesland sat Bjarne og i St. Anton sat Helge Morten. Me hadde same mål for auge,
Lanzarote og Elze. Ferda skal gå mot aust og det nordafrikanske kongedøme Marokko.
Etter ei markering av Ragnhilds åremålsdag med vin og tapas om kvelden, vart
mannskapet komplett sundagsmorgon. Elze fekk vatn og diesel og me kasta loss.
Segla gjekk til topps, Njord var på okkar sida, ver og vind var perfekt. Delfinar
dansa rundt baugen. Sydensol
om dagen, blodraud morgon- og kveldshimmel og så stjerneklare netter at båten
like godt kunne segla rundt i kosmos. Etter to døgr når me Afrikas kyst
og sjørøvarbyen Essaouira, slepp anker og skyt ein ankerdram. Afrika.
|
Essaouira |
Essaouira viste seg å vera ein fantastisk liten by. Byen
står på UNESCO verdsarvliste mykje grunna festninga som omkransar medinaen. Her
finn ein portugisisk-, fransk-, jødisk-, arabisk og afrikansk påverknad i byggjeskikken
og rykte seier at det var her Thorbjørn Egner fann inspirasjon til
Kardemommeby. Jimmy Hendrix og Bob Marley skal ha feriert her og folket her var
attendelente og huglege. Ein fellesnemnar for maten må vera sukker. Sukker til
frukost, sukker til middag og sukker til kvelds og mykje te, med sukker. Og
pannekaker med Nutella. Dei var glade i litt "sutt onna tånnå"
|
Stuttbuksa og snutthua |
Eg fekk skåre håret og Bjarne fekk skåre skjegget. Helge
Morten kjøpte seg ei gjetarkappe frå fjellnomadane, Lars Martin som kaptein,
fekk helsa på heile befalstaben i den marokkanske marinen og Ragnhild fekk omsyning
i motorrommet på ein redningsbåt. Alt var fryd og gaman. Men så byrja me å gå
litt leie. Ankerplassen okkar vart herja av atlanterhavsdønningar kvar natt, me
sov knapt. Den sjarmerande «skjeggsismen» eg vart utsett for på gata, byrja å
mista sjarmen. Eg klarte ikkje lenger smila av «Hello Ali Baba» eller «Ah, Bin
Laden, I know you!». Me vart råka av veldige opp- og nedturar rundt måltida då blodsukkeret
skaut i veret og datt att like fort, og sukkerabstinensane på nettene leia til
skjelvingar, sveittetokter og hovudverk. Fiskelukta i hamna byrja å verta
uuthaldelig og dei «gilde»- hjelparane som hang rundt båten byrja å verta
mange. Me måtte vekk. Men Njord smilte ikkje lenger han heller og sjøen var
ruskut å leggja utpå.
|
Marokkotaxi |
Løysninga vart eit landfarty med hjul som tok okker til surfebrettparadiset
Immsouane, ein liten landsby 2 timars køyring sørover. Her vart me tri netter,
stod på surfebrett og åt grilla fisk
eller bønnesuppa. Sukkerabstinensane byrja å avta og gleda var på plass att. Me
skilde lag med Helge Morten her. Han ville freista lukka med brettet enno
lenger sør, før han fauk attende heim til Las Palmas.
|
Snarvegen heim |
|
Frukost på taket i Immsouane |
Det bar til Essaouira og Elze att, men Njord var enno vrang.
Heile fiskeflåten låg i hamna og fiskarane hadde fått landlov og drakk
heimelaga sprit. Ingen skulle på sjøen før om ei veke. Vinden var for sterk og bølgjene
for store. Men her kunne me ikkje vera. Hamnevakta var dessutan ganske hissig.
Me hadde nemlig lagt Elze utpå den einaste redningsbåten og teke ut i fira dagar.
Det måtte smørast vin, øl og sigarettar
på såret hans før han roa cella. Me hamstra mat, vatn og diesel, og la okker
til å venta på at vinden skulle gjera det same.Ventetida vart nytta på kamelryggen (som Lars Martin har gode bilete av) og på postkortskriving til familien, der det vart hinta varsamt til "takk for alt", i høve draugen skulle taka okker. Klokka 23:00 datt vinden tilstrekkeleg
og høgvatnet var på veg inn. Me fekk snudd båten inne i fiskebåtkaoset og
endeleg pløya me sjø att. Men fiskarane var inne på noko, det var lang ifrå
flatt utpå der. Etter to timars stamping, slag, sjøsprut og motorbrøling, der eg enno såg rett inn i hamna, innsåg eg at dette kjem til å verta nokre dryge 200 nautiske.
|
Fiskebåtar til kai og ein sjømann i baugen |
Eg fekk ganske så rett,
det var 4 bleikansikt som klappa til kai i Mohammedia etter 50 timar. Men alt i
alt gjekk det jo tåleg greitt. Mest dramatikk var nok knytt til dieselfyllinga
i 3 meters bølgjer og då me med eit brak dagen etter innsåg at me nok kunne fylt
på meir. Men etter heroisk fylling, lufting
og pumping, seig Elze vidare.
|
Fiskekroktrøye og fiskestuttbukse |
|
Hiv og aids |
1.mai nytta me i Casablanca. Det var fridag og ungar som
vaksne ga oss ein leksjon i korleis ein fridag skal nyttast. Til gagns! Gatene
var fulle av leikande ungar. Frå moskeen, ein av verdas styrste, hoppa hundrevis av
ungdommar i sjøen, eller tok armhevingar på den fliselagde plassen. Folk sprada
rundt i finstasen og me fekk gå i fred for turistjegrane. Ein indar som freista
å selja okker eit skjell på moskeeplassen, vart teken hand om av politiet. Ein
smule overreaksjon, men litt gudd au. Han var ei maserau.
|
Moske i Casablanca |
|
Fiskarar i Mohammedia |
Når det gjeld dei farga kyllingane, Pærå og Pjuskå, Ragnhild
hadde kjøpt når me kom heim, vil eg berre seia at eg vart ikkje sint, berre
veldig, veldig skuffa... Men det gjekk fort over, for meg og Bjarne hadde funne
ein pub i Mohammedia og enno betre, klokka tolv opna nattklubben. Me fyrte
okker opp med kva enn me kunne finna i båten og med ein silkebris gåande, sette
me kurs mot nye eventyr på muslimsk nattklubb. Og me vart ikkje skuffa, berre
veldig, veldig øvegidde. Fira
dresskledde fjell av nokre menn med propp i øyra møtte okker i døra. Me stilte
i krøllete sumarskjorter med salt- og diesellukt og var sikre på verta sendte
rett ut på gata att, men me vart tekne imot som kongar. Ein følgde okker inn og fann
eit bord til okker, gav okker meny, fruktfat og oliven. Rundt okker sat menn i
40- 50 åra med meir ruskete klede enn me og dansa med armane i veret. Rundt
dei og oppå dei sat små, lettkledde jenter, nokre med tannregulering, og drakk
sprit og brus. Musikken var euro- techno einaste. Menyen viste at desse mennene
nok var godt sette, for ei flaksa whisky og brus kosta 2400,- kr. Bjarne ville
gå med ein gong, men eg insisterte på å henga ut litt og sjå på galskapen. Me
drakk to mojitoar kvar til 80-, kr. Bjarne sa mindre og mindre. Eg fekk
litt kontakt med ein mann med skjelpadde på t- trøya si. Han var trøytande. Han
tok blomen som stod på bordet okkar og dansa med han oppi veret. Men blomen vart
audelagt og då datt skjelpaddemannen på kne framfor meg. Han orsaka seg og gav meg og landet mitt
Noreg all mogleg respekt. Eg sa det gjekk greitt.
|
Trafikkbilete |
Meg og Bjarne fór til Marrakech med toget dagen etter for å
floge heim. Eg grudde. Bror til Ragnhild, Daniel, hadde skildra byen som « 17. mai kvar dag». Eg likar ikkje så godt folkefestar som 17. mai eller
Nærbødagane og når det i tillegg vart fortalt om apekattar i band og klapparslangar
som vart sleng etter deg, hjalp det ikkje bitten. Marrakech var nett som førespegla.
|
Ein oase frå maset |
Rekna ut når eg kom heim at eg har vore med Elze på tur omlag
2600 nautiske mil no. Det er frå Obrestad hamn til New Foundland.
Tru, von og kjærleik
Tormod
For ei fantastisk reiseskildring. God lesning!
SvarSlett